Food for thought
Den nos sistema democratico, un vinculo cuestionabel ta wordo forma entre gobierno (ministernan) y e parlamentarionan cu ta sostene (y mester controla) gobierno. Na hopi ocasion, parlamentarionan cu mester controla ministernan ta depende di e mesun ministernan pa nan posicion y futuro politico. Esaki por forma un conflicto di interes.
Na mesun momento, partidonan politico tin un monopolio riba parlamento. Consecuencia ta cu, entre gobierno (ministernan) y parlamento, na hopi ocasion, interesnan partidario ta prevalece riba e interes di pueblo y pais. Proposicion 21+10 ta propone un cambio pa trece un miho balansa den nos democracia.
Proposicion 21+10
Proposicion 21+10 ta encera un aumento di parlamento cu 10 parlamentario independiente. E parlamentarionan independiente lo wordo escogi door di pueblo den 10 diferente districto. Pa haya un asiento independiente, un candidato mester logra mas cu 50% di e votonan valido den su districto. Si ningun candidato den un districto logra mas cu 50% di e votonan valido, un di dos votacion lo tuma luga entre e dos candidatonan cu a ricibi mas voto valido durante e prome votacion.
Candidatonan pa eleccion di parlamentario independiente no por ta miembro y/of candidato di un partido politico. Tampoco e candidatonan por a aparece riba un lista politico durante e 5 añanan prome cu e eleccion di parlamentario independiente, cu un minimo di dos eleccion parlamentario di partido.
E termino di parlamentario independiente lo ta 3 aña y no ta wordo afecta si un gobierno cay.
Splicacion mas amplio: Proposicion 21+10 (pdf)
Democracia balansa
Cu un aumento di parlamento cu 10 parlamentario independiente, un mayoria di 16 voto lo ta necesario pa pasa ley, amienda, mocion, eligi presidente di parlamento, etc. Esaki por percura pa un balansa mas husto den nos democracia, embes di e concentracion di poder y monopolio di partido. Gobierno y e fraccion/coalicion cu ta sostene gobierno lo mester traha hunto cu oposicion y/of parlamentarionan independiente pa logra suficiente sosten pa pasa ley, amienda, etc. Tambe e parlamentarionan independiente por eherce e control cu parlamentarionan tin cu eherce riba gobierno, sin influencia partidario. Mescos cu parlamentarionan di partido, parlamentarionan independiente lo por haci pregunta na ministernan, entrega concepto di ley, mocion y amienda, haci peticion pa reunionnan, vota pa y wordo eligi (vice-)presidente di parlamento, y mas.
Cu 10 parlamentario independiente nos por trece un miho balansa den e concentracion di poder politico, percurando pa un democracia mas balansa.
Esaki ta un splicacion cortico di proposicion 21+10.
