Ta conoci cu bebe dimas koffie por tin su consecuencianan negativo, por ehempel crea un dependencia fisico of produci stress pa bo curason. Pero bo tabata sa cu koffie lo por ta bon pa bo salud?
Koffie ta un di e bebidanan mas popular na mundo. Hopi ta esnan cu no por cuminsa nan dia sin bebe un koffie den mainta of durante dia di trabou. Na varios pais hasta ta custumber pa bebe koffie despues di come cuminda cayente.
Dos estudio nobo ta conclui cu bebe koffie regularmente por conduci na un bida mas largo. Un di e estudionan a sigui mas di 52.000 persona, na dies pais Europeo. Esaki ta e estudio mas grandi cu a yega di wordo haci tocante koffie y bida. E resultado ta mustra cu personanan cu bebe tres of mas koffie pa dia tin un riesgo mas chikito di morto cu persona cu no ta bebe koffie.
Specificamente, investigadornan a conclui cu bebe koffie tin un relacion inverso cu malesa di higra, suicidio entre hende homber, cancer entre hende muhe y tambe malesa di digestion y circulatorio.
E otro estudio a enfoca riba populacionnan cu no ta di etnicidad blanco. Despues di a investiga mas di 185.000 Americano di color scur, Americano Indian, Hawaiiano, Americano Japones, Latino y tambe blanco, a conclui cu koffie ta prolonga bida y cu etnicidad di un persona no ta haci un diferencia pa cu esaki.
A pesar cu e populacionnan tin diferente estilo di bida, diferente custumber culinario y riesgo, toch a mira un patrono similar entre e gruponan aki. Segun e estudio, personanan cu bebe koffie dos pa cuater biaha pa dia tin 18% menos riesgo di fatalidad compara cu personanan cu no ta haci esaki. Tambe, investigadornan a conclui cu consumo di koffie ta reduci e riesgo di mortalidad relata na malesa di curason, malesa celebrovascular, cancer, malesa respiratorio, diabetes y malesa di riñon.
Pues e siguiente biaha cu nan ofrese'bo koffie na cas of trabou. Dal bay!
