Desde 1930, cada cuater aña FIFA ta organisa e torneo pa e Copa Mundial di futbol di seleccionnan nacional masculino. Excepcionnan tawata 1942 y 1946, ora pa motibo di e segundo guera mundial a cancela e torneo. Durante e 20 torneonan cu a tuma luga, ocho diferente pais a logra gana e Copa Mundial.
Brasil
Brasil ta lidera mundo den cantidad di biaha cu nan a logra gana Copa Mundial. Brasil a gana e copa cinco biaha: na 1958, 1962, 1970, 1994 y 2002. Brasil tambe a sali na di dos luga na 1950 y 1998. E Brasilero Edson Arantes do Nascimento, miho conoci como Pelé, te ainda ta e unico futbolista cu a forma parti di tres seleccion cu a gana e Copa Mundial.
Pa Copa Mundial 2018, Brasil tin e presion di reestablece su mes como pais dominante den Copa Mundial, considerando cu nan titulo mas recien tawata 16 aña pasa. Tambe nan a wordo elimina for di Copa Mundial 2014, perdiendo 7-1 contra Alemania, cual ta e team cu e aña aki lo purba iguala Brasil den cantidad di titulo.
Alemania y Italia
Ambos Alemania como Italia a bay cu e titulo di campeon mundial cuater biaha. Alemania a logra esaki na añanan 1954, 1974, 1990 y mas recien na 2014. E cuater titulonan aki a wordo logra den mita di e biahanan cu Alemania a yega e wega final. Na añanan 1966, 1982, 1986 y 2002 Alemania a termina na di dos luga.
Italia a bay cu e titulo na añanan 1934, 1938, 1982 y 2006. Na aña 1970 y 1994 Italia a sali na di dos luga.
Argentina y Uruguay
Ambos di e dos paisnan Sur Americano aki a logra e titulo maximo dos biaha. Argentina a logra esaki na 1978 y 1986, mientras cu na tres ocacion nan a perde e wega final y termina na di dos luga (1930, 1990, 2014). Kisas e wega mas memorabel na 1986 no tawata e final (cual Argentina a gana 3-2 di West Alemania) sino e wega entre Argentina y Inglatera den cuarto final. Durante e wega aki, Diego Maradona a hinca dos gol famoso. E prome gol tawata uno contra regla, pa motibo cu Maradona a dal e bala den gol cu su man. E referee no a ripara y e gol a wordo conta como valido. E gol aki ta conoci como ‘the hand of God’.
Algun minuut despues di e gol hinca cu man, Maradona ta score un segundo gol memorabel, pa cual ela pasa como cinco hungado di Inglatera cubriendo mita veld cu e bala.
Actualmente Argentina tin e futbolista cu hopi hende ta considera e miho hungado di mundo: Lionel Messi. Despues di a perde e wega final na 2014, Argentina ta spera di bay cu e copa despues di 32 aña.
E hungado di Uruguay mas conoci actualmente ta e teammate di Lionel Messi na FC Barcelona, Luis Suárez. Suárez tambe ta conoci pa a usa su man durante Copa Mundial, pero contrario na Maradona, Suárez a usa su man pa preveni un gol contra, pa cual ela haya un carchi cora. E seleccion nacional di Uruguay lo competi pa gana e copa despues di 68 aña. Uruguay a sali campeon na 1930 y 1950.
Francia, Inglatera, Spaña
Cada un di e tres paisnan Europeo aki a gana e copa 1 biaha. Francia na 1998 (y di dos luga na 2006), Inglatera na 1966 y Spaña na 2010.
Hulanda
Di tur e paisnan cu nunca a gana un Copa Mundial, Hulanda ta e pais cu a sali di dos luga mas hopi. Na 1974, 1978 y 2010 Hulanda a perde e wega final. Hulanda no a cualifica pa Copa Mundial 2018 y lo mester warda te 2022 pa un siguiente oportunidad pa logra gana nan prome Copa Mundial.
Femenino
Futbol no ta un wega pa homber so. Desde 1991 tambe tin un Copa Mundial pa seleccionnan nacional femenino, cual tambe ta wordo organisa pa FIFA cada cuater aña.
Di e shete torneonan di Copa Mundial cu a tuma luga te ainda, Merca a sali campeon na tres ocasion: 1991, 1999 y mas recien 2015. Merca a sali na di dos luga na 2011.
Alemania a bay cu e Copa Mundial femenino na dos ocasion: 2003 y 2007. Na 1995 Alemania a sali di dos luga.
Noruega a bay cu e copa na aña 1995 y a sali na di dos luga na 1991. Hapon a gana na aña 2011 y sali na di dos luga na 2015.
E siguente Copa Mundial femenino lo tuma luga den aña 2019.
