Zwarte Piet: racismo of inocente?

E prome biaha cu e figura Zwarte Piet a aparece tabata alrededor di 1850 den e buki ‘Sint Nicolaas en zijn Knecht’ di Jan Schenkman. Prome cu e temporada ey, Sinterklaas no tabata tin un ayudante (knecht). E nomber ‘Zwarte Piet’ no tabata wordo usa den e buki. Te alrededor di 1895 e nomber Zwarte Piet a bira mas comun (prome cu esey ela wordo yama 'Pieter').

 

 

Den e buki di Jan Schenkman, e knecht tabata illustra como un sirbido color scur, y no tabata tin stereotiponan racial. E tabata bisti un uniform di sirbiente pero e no tabata tin lipnan pinta cora, oorbel grandi, etc. E stereotiponan racial a wordo añadi y a sigui bira mas exagera den siglo 20, caminda cu e ayudante a wordo desaroya den e Zwarte Piet cu nos conoce awe.

 

E figura historico di San Nicolas a nace na Patara (awendia den Turkia). Pero tambe den folklor por atribui Sinterklaas na e storia di e dios Germanico yama Wodan. Wodan tabata den cielo y tabata tin su ekivalente den fierno, un asina yama spirito subteraneo cu den mitologia Germanico semper tabata wordo representa como color scur.

Un teoria ta cu e spirito subteraneo aki ta un fuente di Zwarte Piet su color preto. Considerando cu e prome ilustracionnan di Zwarte Piet obviamente ta mustra un persona di etnicidad color scur, y cu Zwarte Piet tabata wordo describi como un “kroesharige neger” den diferente publicacion, ta deshaci di e teoria aki.

Segun Elmer Korin, docente di historia di arte na Universidad di Amsterdam, no tin duda cu e figura di Zwarte Piet tin influencianan di mucha color scur cu tabata esclavo (kindslaven). Cu pintura y historia di siglonan 17 y 18 e ta mustra riba e similaridadnan den e pañanan cu mucha esclavo y Zwarte Piet ta bisti. Segun Korin, ta conoci cu e esclavonan no tabata gusta bisti e  vestuario.

 

 

Zwarte Piet ta wordo compara hopi cu ‘blackface’. Blackface ta algo cu hopi Hulandes no sa di dje. Na Merca (y despues tambe na otro paisnan manera Inglatera) den siglo 19 y 20, personanan color scur no tabata mag di actua den teatro y den mundo di television. Pues  hende color cla tabata pinta nan cara preto cu make-up pa asina representa y expresa stereotipo di un persona color scur. Hopi biaha haciendo esaki na un manera comico y exagera pa entretenimiento di e publico color cla.

 

 

Na dado momento hasta hende color scur mester a cuminsa pinta nan mes preto pa mag di practica nan instrumento riba escenario.

E practica di blackface a cuminsa rond di 1830 y a sigi pa mas cu 100 aña. E tabata algo hopi popular na Merca, y despues tambe na paisnan Europeo. E manera cu e ‘knecht’ di Sinterklaas a wordo transforma di un sirbido color scur pa e Zwarte Piet ful preto cu lipnan cora etc., ta duna e impresion cu Blackface a influencia e imagen di Zwarte Piet. Especialmente considerando e temporada di e desaroyo aki.

 

 

Blackface a wordo bandona den añanan 60 di siglo 20, ora cu e Civil Rights movement na Merca a cuminsa ricibi suficiente sosten pa exigi cambio. Awendia e no ta wordo usa mas pasobra e ta wordo considera racista y ofensivo.

Awendia, masha hopi hende no ta kere cu un figura cu ta forma parti di e cultura Hulandes por tin di haber cu esclavitud. Hopi tin e impresion cu Hulanda no tabata envolvi den e practica di esclavitud y bendemento di esclavo. No ta straño cu hopi persona cu a lanta na Hulanda tin e impresion ey, ya cu na Hulanda no a dedica suficiente atencion na e parti aki di nan historia. E materia cu scolnan na Aruba ta siña studiantenan, a wordo basa riba e curiculo Hulandes, pues no ta straño cu hopi hende na Aruba tambe tin un falta di conocemento riba e tema aki.

 

E realidad ta cu Hulanda ta responsabel pa traslada alrededor di 550.000 Africano for di Africa pa otro parti di mundo, for di cual alrededor di 75.000 lo a muri prome cu nan a yega nan destinacion. Te na 1863 Hulanda a aboli esclavitud. No por descarta cu e fenomeno di esclavonan Africano y racismo pa cu persona color scur a influencia loke a bira Zwarte Piet.

Banda di e discusion di e origen di Zwarte Piet, tin discusion riba e elementonan stereotipico di personanan color scur. Similar na blackface, Zwarte Piet tin lipnan accentua pa pone nan mustra mas diki, cual ta un stereotipo di hende color scur. Esaki tabata wordo haci den un forma exagera, especialmente den ilustracionnan di Zwarte Piet.

Un otro aspecto cu ta wordo considera stereotipico ta e renchi di orea di Zwarte Piet. E estilo di e renchi di orea ta e estilo ‘creol’ di Africano. Manera menciona caba, e verstuario di Zwarte Piet ta similar na e vestuario cu mucha color scur esclavo mester a bisti.

 

Un desaroyo cual pa motibonan obvio a bira menos cu tempo, ta e custumber pa Zwarte Piet papia cu un accent Surinameo, hopi biaha exagera. No tabata algo straño pa wak Zwarte Pieten riba television Hulandes ta papia manera Surinameo, bailando loco riba musica Caribense y actua manera hende bobo. Sigur e lo a pone mucha hari, pero na mesun momento tabata haci bofon di Surinameo color scur, cual tabata e grupo mas grandi di imigrantenan na Hulanda den e temporada ey.

Mester remarca cu no ta corecto pa asumi cu esnan cu no kier cambia Zwarte Piet automaticamente ta racista. En berdad hopi a haci expresionnan y comete actonan racista den direccion di personanan color scur cu ta 'contra' Zwarte Piet. Pero tambe tin hopi hende  cu ta ‘pro Zwarte Piet’ cu no ta racista. Nan a lanta cu Sinterklaas y Zwarte Piet y a celebra e tradicion hopi aña inocentemente, sin pensa riba e origen y e efecto cu e por tin den sociedad. Por nota cu na Hulanda hopi persona  ta remarca cu tabata pa motibo di un falta di conocemento cu nan no por a wak algo malo den Zwarte Piet. Tambe ta wordo menciona cu no ta facil pa acepta y admiti cu un tradicion di bo pais (Hulanda), algo cu bo tin bunita recuerdo di dje como mucha, en berdad tin elementonan racista. 
Segun Verene Shepherd (directora di Institute for Gender & Development Studies, profesora di historia social y miembro di e Working Group of Experts on People of African Descent di Nacionnan Uni), falta di conocemento ta e rason primordial dicon pueblo Hulandes no ta mira e malo den e tradicion di Zwarte Piet. “If you don’t know the history, you are not going to understand why some people are offended by this”, segun Shepherd.

 

Un comision special di Nacionnan Uni cu a investiga e fenomeno di Zwarte Piet, a yega na e conclusion cu e ta racismo y cu cambio mester bin den e apariencia di Zwarte Piet y su relacion cu Sinterklaas.

 

Mientras cu ainda hopi hende no kier pa Zwarte Piet wordo cambia, e elementonan cu influencianan discriminatorio ta mustra di ta algo cu Hulanda no por ‘scapa’ for di dje. E apariencia y actuacion di Zwarte Piet a wordo cambia na varios ocacion. Tambe e storia cu ta wordo conta na mucha a cambia. Prome, Zwarte Piet tabata un sirbido color scur ‘no mucho sabi’. Cu tempo ela bira un ayudante cu no ta un persona color scur, pero a bira completamente scur door di pasa door di un schoorsteen. Hopi di e cambionan a wordo haci despues di basta critica riba Zwarte Piet. Contrario na loke hopi hende ta kere, for di algun decada pasa caba tin critica riba Zwarte Piet. Den hopi caso e critica a wordo considera na su luga, cual a conduci na varios di e cambionan. Pero e cambio principal cu mayoria di esnan cu kier cambia Zwarte Piet kier wak (schmink preto), te ainda no a wordo acepta completamente.

Mientras cu e discusion tocante Zwarte Piet mas tanto ta trata si Zwarte Piet ta un figura racista, poco poco  mas persona ta acepta cu no por nenga cu Zwarte Piet tin elementonan cu influencianan racista. Pa esnan cu conoce e historia di Zwarte Piet, e pregunta principal den e discusion no ta ‘si Zwarte Piet tin elementonan racista’, pero ‘si mester cambia e elementonan racista of no’.

 

No mester lubida riba e grupo cu ta gosa mas hopi di e tradicion di Sinterklaas: muchanan. Ta mustra cu mayoria adulto ta di acuerdo cu muchanan lo gosa mesun hopi di e celebracion si   Piet lo tin ‘zwarte vegen van de schoorsteen’, of si Piet haya diferente colornan.

Durante e yegada di Sinterklaas na Aruba (2018) por a nota mas cu 100 ‘Piet’ cu tabata tin nan caranan pinta completamente preto. E hecho cu na Aruba, y tambe na Corsou, keto bay tin Zwarte Pietnan mas 'tradicional' na yegada di Sinterklaas, ta wordo usa como argumento cu na Hulanda Zwarte Piet tambe mester wordo acepta den su forma tradicional.