Tin hopi cos cu por wordo haci pa proteha nos medio ambiente. Pa cierto forma di proteccion ta necesario pa envolvi gobierno, cambia ley y haci acuerdonan internacional. Tambe tin cosnan cu nos tur por cuminsa haci awe mes. Spaar awa
Bo ta skeiro bo djente durante un baño mientras cu awa ta sigui core? Bo ta canta of relax den baño lubidando cu bo ta gastando awa? Of kisas bo ta gasta awa innecesariamente pa un of otro motibo menos obvio. Purba pone atencion cada biaha bo habri un cranchi y e chens ta grandi cu bo lo ripara cu bo por gasta menos awa. Medio ambiente y bo cuenta di banco lo gradici'bo pa esaki.
Laga auto para No ta un secreto cu auto cu ta core riba gasolin of diesel ta crea hopi polucion. Cana, core bicicleta of tuma bus ta opcionnan mas faborabel pa medio ambiente. Kisas Aruba no ta e luga mas ideal pa e opcionnan aki; solo ta fuerte, core bicicleta den trafico por ta peligroso, y bo no lo yega tur caminda cu bus. Na mesun momento hopi di nos ta asina custuma cu bay tur caminda cu auto, cu nos ta subi auto pa bay un caminda cu nos por yega na pia den 15 minuut of menos. Re-evaluando nos moda di transporte por yuda medio ambiente y ta bon pa bo salud y figura tambe.
Paga luz No solamente luz, pero tur aparato cu ta usa electricidad mester wordo usa conscientemente. Por ehempel, no laga bo airco cendi innecesariamente, of purba us’e riba un nivel mas economico. Cierto caminda bo lo kier laga luz cendi pa siguridad, pero evalua cua luznan bo ta laga cendi innecesariamente. Kisas bo tin e custumber di laga bo television cendi sin cu bo ta wak television, of bo computer of printer ta cendi henter dia sin cu mester. Tumando esaki na cuenta ta bon pa medio ambiente y bo cuenta bancario.
Agricultura
Tin diferente motibo pa planta bo mesun cuminda. Hasta si ta tiki, e lo haci un diferencia si bira custumber pa planta algo den bo cura cu ta produci cuminda . E ta un bon manera pa percura cu bo cuminda no tin pesticides. Tambe considera cumpra mastanto producto local. Asina nos por importa menos cuminda cual kiermen menos transporte di cuminda, pues menos polucion. Economicamente tambe ta bon pa Aruba reduci su dependencia riba importacion di cuminda.
Re-usa
Si bo tin cu bent’e afo sin por us’e hopi biaha, busca un alternativa. Sea ta saco di plastic, cup di plastic of bateria cu no ta recargabel, tin opcionnan miho pa nos medio ambiente. Pa hopi di nos e ta mastanto un cambio den nos manera di pensa y balora cosnan material. Realisa cu tin hopi polucion tumando luga pa produci e productonan aki. Tambe tene na cuenta e efectonan di ‘djies benta cos afo’ cual ta resulta den mas polucion y por empeora e situacion di dump na Parkietenbos.
Tambe tin productonan mas duradero cu hopi di nos ta benta afo enbes di duna hende of un instancia cu por sigui haci uso di dje. Ta un lastima pa benta paña, muebles etc. afo mientras cu un otro persona por haci bon uso di dje. Pues purba reduci e cantidad di sushi/producto cu bo ta benta afo.
