Shete caracteristica di persona superproductivo

Hopi di nos conoce un persona cu ta sumamente productivo. E ta keda cla cu tur su trabou anto cu tempo di sobra! Kico ta e secreto? Of miho bisa, kico ta e caracteristicanan di un persona superproductivo? 

Segun un estudio di Michael Mankins, persona superproductivo tin den tur industria y den tur clase di trabou. Un software developer, sales associate, carnicero y dealer di blackjack tur por sobresali den cuanto nan por haci riba un dia di trabou. Teniendo esaki na cuenta, e pregunta cu ta bin dilanti ta pakico. Jack Zenger y Jospeh Folkman a investiga esaki pa asina yega na kico persona superproductivo tin en comun.

Sea ta bende mas producto den un tienda, of den e caso di un dealer den casino, mantene hende na su mesa pa un periodo mas largo, persona superproductivo ta comparti e siguiente caracteristicanan:  

 
#1 Pone meta grandi
Crea y traha riba un proyecto grandi ta encurasha'bo pa enfoca riba esaki y ta elimina distraccion. Un persona superproductivo tin e custumber di pone un meta grandi su dilanti anto cumpli cu esaki, tanto na trabou como na cas. 

 

#2 Sea consistente
Ora bo bisa loke bo ta bay haci, haci tambe loke bo a bisa. Personanan superproductivo no ta experiencia un fluctuacion den nan nivel di productividad. Tampoco nan ta pospone trabou pa despues mester pasa henter anochi ta traha pa por keda cla. Personanan superproductivo a discubri pa nan mes, con nan por produci resultado tur siman, haciendo esaki na un forma consistente, cu un cadencia y ritmo cu ta permiti nan mantene un bon momentum. 
#3 Tin conocemento y experticio tecnico 

Falta di conocemento y experticio ta un problema serio pa loke ta concerni productividad. Ora bo sa kico bo ta haciendo, bo no mester sacrifica calidad pa velocidad. Bo no mester busca un tutorial of puntra un colega pa ayudo; bo por haci bo trabou lihe, y bon tambe.  

Segun e estudio di Harvard, persona superproductivo no ta duda pa puntra pa ayudo. Pero di otro banda, e persona superproductivo casi nunca mester pidi pa esaki. Otro aspecto mas di e persona superproductivo ta cu e ta intencionalmente busca pa adkiri abilidad nobo y semper ta sigui traha pa mehora su mes y expande su experticio. P'esey e persona superproductivo ta competente, exigente y rapido den su trabou. 
#4 Pusha pa resultado
Mayoria di hende ta dispuesto di tuma responsabilidad pa logra metanan y traha riba un ritmo rasonabel pa asina logra e resultadonan cu ta wordo spera. Pero tin persona cu tin un deseo di logra resultadonan mas prome y mas lihe. Nan  ta feliz di por scrap algo di nan to-do list. E ta competitivo y no ta competi solamente cu su coleganan, pero tambe cu su mes. E kier establece un record pa su mesun 'performance', anto haci su best pa kibra esaki despues. 

 #5 Anticipa y resolve problema

Un caracteristica di mayoria hende productivo ta nan abilidad di resolve problema. Nan ta bin cu solucion inovativo y haci nan trabou mas eficiente. Tambe nan ta anticipa obstaculo y cuminsa traha riba solucionnan di antemano, asina evitando algun problema cu otro hende si lo encontra. Psicologonan social ta referi na esaki como contraste mental; pensa riba loke bo kier logra y kico lo por stroba esaki. E manera di pensa aki, ta yuda un persona logra su meta.

Pa hopi hende, e parti mas dificil di haci un trabou, ta cuminsa cun'e. E persona superproductivo ta cuminsa lihe. E nunca mester wordo bisa pa cuminsa. E ta pidi pordon y no permiso. Su predisposicion pa tuma accion por caus'e problema tin biaha ya cu e ta dal bay cuminsa traha sin cu tur partido a yega na un acuerdo. Pero su hefe normalmente no ta keha, paso e resultado ta papia pa su mes.

#7 Colabora
Awendia den negoshinan compleho tur cos ta interdependiente y masha tiki ta wordo haci den isolacion. Segun e estudio, e persona mas productivo no ta un trahado individual; e ta colabora hopi y traha bon cu otro hende. 

E hendenan mas productivo ta laga parce cu nan ta logra haci tanto cos danki na sea podernan magico of salta cierto paso. Pero e realidad ta cu ta superproductivo simplemente ta e resultado di abilidadnan cu nos tur por adkiri y implementa.
 

Abo kier ta mas productivo? Lesa e lista aki y wak den cua aspecto bo lo por mehora bo mes. Sea ta traha na un forma consistente, anticipa problema of colabora mas cu bo coleganan. 

Estudio
E lista di caracteristicanan ta basa riba un estudio den cual cientificonan a colecta informacion di mas di 7000 persona cu a wordo califica (duna un rating) door di nan manager pa cu nan nivel di productividad y 48 comportamiento specifico. Tambe e personanan aki a wordo califica pa 11 otro hende, incluyendo colega y subordinado. A base di e data aki, a identifica e top comportamientonan cu tabata corela cu nivelnan halto di productividad y despues a analisa esakinan. E resultado tabata shete cluster consistente di comportamientonan cu personanan superproductivo ta practica regularmente.