Afirmacion

Tony Robbins? Steven Covey? Si bo ta conoci cu e nombernan aki, e ora probablemente bo ta consciente di e beneficionan di ta y pensa positivo. Un actividad relaciona cu esaki, y cu ta creciendo den popularidad, ta e practica di afirmacion.

Kico ta afirmacion?

Hopi hende ta practica afirmacion. Di comerciante y deportista te cu ama di cas; e practica ta birando mas y mas popular. Sea ta den mundo di comercio, benta, salud, deporte, psicologia y marketing, mas y mas hende ta practica afirmacion; e actividad di recita frasenan (ideanan) cu bo kier percibi como berdad.

Afirmacionnan ta frasenan cortico cu ta afecta bo mente consciente y inconsciente. E palabranan cu ta forma e afirmacion automaticamente y involuntariamente ta trece padilanti imagennan mental cu por inspira y motiva. Ora bo ripiti afirmacionnan y e imagennan mental cu ta resulta, bo ta afecta bo mente subconsciente cual na su turno ta influencia comportacion, custumbernan, accionnan y reaccionnan.

E origen di practica afirmacion

Den su esencia, e practica ta basa riba e concepto di simplemente 'pensa positvo'. E idea tras di esaki ta cu un actitud mental positivo, cu ta wordo sosteni pa afirmacionnan, lo conduci na exito den tur aspecto di bida.

E origen di e manera di pensa aki ta wordo atribui na bukinan cu a wordo skirbi na final di e 'Gran Depresion' di 1929. Tabata personanan manera Dale Carnegie y Napoleon Hill cu a skirbi e prome bukinan cu a toca e mentalidad aki.

Durante añanan '50 y '60 mas autor a sigui e liña aki di pensa positivo, cada un riba nan mesun manera. Norman Vincent Peale a publica 'The Power of Positive Thinking' na 1952, mientras cu den su buki 'Psycho-cybernetics' (1960), Maxwell Maltz a splica con pa usa entrenamento mental a base di pensamentonan positivo.

Con afirmacion por yuda'bo?

Afirmacionnan ta yuda'bo sinti mas positivo, energetico y ta yuda'bo posiciona bo mes miho pa por cambia bo bida di paden y pafo. Tambe, afirmacionnan ta motiva'bo pa mantene bo mente enfoca riba bo meta. Un otro aspecto di afirmacionnan ta cu nan ta activa bo mente subconsciente y consecuentemente ta cambia e manera cu bo ta pensa y actua.

affirmation independent woman 3566942 1280

Tin base cientifico pa afirmacion?

Afirmacion ta algo cu ta wordo asocia cu pensamento New Age y/of New Thought. Proponientenan di afirmacion ta di opinion cu pensamentonan, deseonan y emocionnan ta loke ta crea nos mundo. Un critica di e pensamento New Age ta cu varios ponencia no lo ta basa riba ciencia. Pero e practica di afirmacion no ta simplemente un concepto sin base. Varios analisis cientifico a wordo haci riba e efectonan di practica afirmacion. Ta interesante pa wak kico cientificonan ta pensa di esaki.

Dos estudio publica hunto den e revista cientifico Body Image na 2015 bou di e titulo 'Self-affirming trait kindness regulates disgust toward one's physical appearance' a mustra cu e practica di afirmacion basa riba e caracteristica di 'bondad' ta yuda regula disgusto corporal den personanan cu ta disgusta cu nan apariencia fisico (Powell, Simpson & Overton, 2015).

Similarmente, un otro estudio recien publica den Journal of Experimental Social Psychology titula 'Affirmation prevents long-term weight gain' a mustra cu afirmacion por preveni cu persona cu ta core riesgo di sobrepeso ta sigui subi mas di peso. Den e estudio aki, cientificonan a tuma contacto cu hende muhe cu a participa den un estudio di sobrepeso cu a envolvi afirmacion mas di dos aña despues cu nan a participa den e estudio aki. E muhenan cu a practica afirmacion, no a subi di peso mientras cu e muhenan cu tabata den e grupo di control si a sigui subi di peso (Logel, Katmandu & Cohen, 2018).

Un otro estudio (Tang & Schmeichel, 2015) cu a mustra e efectonan positivo di afirmacion riba salud, a keda publica den e revista cientifico Biological Psychology. Segun Tang y Schmeichel, e practica di afirmacion por reduci presion arterial. Por ehempel, un persona cu ta afirma su mes no ta experiencia un subida den ritmo cardiaco ora e wordo insulta. Den otro palabra, si bo ta un persona cu ta rabia of ansha lihe, kisas introduci un practica di afirmacion den bo rutina diario por percura pa varios beneficio pa bo salud fisico y mental.

Con ta practica afirmacion?

Un afirmacion ta un declaracion cu mester wordo ripiti y skirbi frecuentemente. Esaki ta algun conseho pa skirbi bo mesun afirmacionnan:

Skirbi un afirmacion cu ta reforsa e pensamentonan positivo cu bo lo kier tin di bo mes (balentia, beyesa, sabiduria, etc.).
Skirbi den un tempo presente (ami ta).
Cu bo texto, expresa un bondad y generosidad profundo dirigi na bo mes.
Skirbi e texto na un manera hopi personal. Bo afirmacion ta pa'bo so.

Haci e recitacion (y skirbimento) di e afirmacionnan un rutina diario. Preferiblemente, algo cu bo ta haci na varios momento di dia. Por ehempel, ripiti e afirmacionnan pa 5 minuut, tur mainta ora bo lanta, merdia ora di break y anochi prome bo drumi.

Ehempelnan di afirmacion

Afirmacionnan por tin varios intencion. Por ehempel, felicidad, salud fisico, maneho di placa, exito comercial, etc. Algun ehempel di afirmacion ta:

Ami ta contento y feliz.
Ami ta hopi satisfecho cu mi bida.
Mi bida ta yen di amor, alegria y amistad.
Ami ta kies pa habri mi curason y laga cosnan bunita drenta den mi bida.
Ami tin e control riba mi bida.
Tur cos den mi bida ta exactamente manera cu nan mester ta.
Mi relacionnan ta yena di amor y harmonia.
Mi ta un fuente di energia positivo.
Mi salud ta e cos di mas importante pami.
Mi tin e poder pa controla mi peso.
Mi curpa ta un tempel y mi ta tene mi tempel limpi.
Mi ta un ganador.

Esnan cu conoce e boxeado Floyd Mayweather kisas ta conoci cu algun lema cu e deportista aki ta gusta usa y instrui su siguidonan pa ripiti cun'e. Por ehempel, 'all work is easy work' y 'hard work & dedication. Tambe, na dado momento durante su carera el'a cuminsa yama su mes TBE (the best ever) anto produci paña y acesorio cu TBE. Mientras cu hopi lo considera esakinan nada mas cu un deportista gabando su mes, e practicanan di Floyd Mayweather por wordo cualifica como un practica di afirmacion.

Consecuencianan negativo di afirmacion

E practica di afirmacion no ta pa tur hende. Ta berdad cu un persona insigur por beneficia di un practica di afirmacion. Pero tin estudio cu a mustra lo contrario ora ta trata di hende cu ya caba tin un creencia negativo di nan mes (Wood, Perunovic & Lee, 2009). Un persona, cu ta berdaderamente kere algo 'malo', lo sinti su mes ainda mas malo ora e cuminsa practica afirmacion. Esaki ta paso e declaracion cu e ta haci, ta totalmente contrario na su creencia central tocante e aspecto aki di su mes. Pues e practica di afirmacion, a pesar di por tin resultadonan positivo pa hopi hende, no necesariamente ta funciona pa tur hende.