Hangover - kico ta un hangover y con pa preveni esaki?

HangoverAlcohol ta e droga di mas popular na mundo. Na Aruba tambe, masha hopi hende ta haci uso y disfruta di alcohol. Pero un di e efectonan fastioso di alcohol, ta cu ora bo bebe dimas, bo ta sinti'e pa su mañan.

Na Aruba tin un dicho: 'haltura ta nos cultura.' Hopi hende ta gusta bebe, y na Aruba tin hopi oportunidad pa haci esaki. Pero kico ta pasa ora un persona bebe dimas riba un dia? Ta hopi probabel cu e dia siguiente, e persona ta lanta malo. Esaki ta e hangover.

Gran parti di esnan cu ta gusta bebe hopi, ta conoci cu e fenomeno di hangover. E sintomanan di hangover ta inclui dolor di cabes, mareo, cansansio, nausea, problema di stoma, soño, sodamento, hopi sed y falta di claridad cognitivo.

Wayaba, pero dicon?

A pesar cu un hangover ta algo comun y coriente, cientificonan no ta 100% sigur kico ta causa un hangover. E relacion entre alcohol y un hangover ta uno complica. Basicamente, un hangover ta wordo causa pa motibo cu alcohol ta interferi cu e curpa su balansa di kimico. Loke ta sigur, ta cu alcohol ta causa dehidracion y esaki tin consecuencia negativo pa nos curpa.

Dehidracion

E curpa humano ta depende masha hopi di awa. Alcohol, di otro banda, ta traha como un diuretico, es decir, e ta subi produccion di urina den nos curpa. Asina ta, mas nos bebe, mas nos ta urina, y menos awa ta keda den nos curpa. E falta di awa den nos curpa ta conduci na varios sintoma di hangover. Un otro aspecto negativo ta cu ora di urina y dehidrata, nos curpa ta perde varios nutriente.

Mientras cu dehidracion pa via di alcohol ta e causa principal di un hangover, e no ta splica e gravedad. Dehidracion riba su mes, ta causa mareo y sed, pero un hangover por consisti di varios otro sintoma cu no ta directamente relaciona na dehidracion.

Cientificonan te ainda no ta sigur kico exactamente ta causa tur e sintomanan asocia cu un hangover. E gravedad di un hangover por varia pa cada persona.

Asian Glow?

Akinan e fenomeno di hangover ta bira interesante. Por ehempel, hopi persona di herencia asiatico tin un mutacion genetico cu ta pone cu nan curpa ta converti alcohol mas lihe den acetaldehido (un substancia hopi toxico cu ta wordo crea ora nos curpa procesa alcohol). Gran parti di e grupo aki alabes tin un otro mutacion genetico cu ta stroba e siguiente fase metabolico di converti acetaldehido den acido acetico. A consecuencia di e mutacion aki, nivelnan halto di acetaldehido ta acumula den nan curpa. P'esey, persona asiatico por sea bira cora ('Asian Glow') of experiencia hangover mas severo.

E tipo di alcohol ta hunga un rol

E tipo di alcohol cu bo ta bebe tambe por afecta e efecto di un hangover. Logicamente, si alcohol ta causa dehidracion, bebidanan cu ta contene hopi alcohol - alcohol stret, shots etc. - tin mas chens di duna'bo un hangover, compara cu cerbes y biña. Pero tin un otro aspecto cu ta hopi interesante: congeners

Ora di produci alcohol, e proceso di fermentacion ta crea algun kimico cual rastronan ta keda den e bebida. Na ingles ta yama esakinan 'congeners.' Segun estudionan, mas congeners tin den un bebida, mas severo e hangover. E cantidad y tipo di congeners lo por splica dicon hasta ora cu tur e alcohol sali for di e curpa, ainda ta sigui sinti efectonan di e hangover. Particularmente, ora nos curpa procesa e congener 'methanol,' e ta crea substancianan hopi toxico manera formaldehida y acido formico.

Bebidanan scur manera bourbon, cognac, tequila y whisky ta halto den congeners, mientras cu bebidanan mas cla, manera vodka, gin y rum blanco tin menos.

Con pa preveni un hangover?

E manera mas facil pa preveni un hangover ta simplemente no bebe, o por lo menos, no bebe dimas. Pero si bo ta insisti, akinan tin algun tips cu bo por sigui prome of durante di bebe:

Come cuminda saludabel cu hopi vitamina

Un manera pa preveni un hangover ta door di bebe alcohol pareu cu cuminda of despues di come. Ora cu bo tin cuminda den bo stoma, e proceso di kibra alcohol ta tarda mas y e chance di un hangover (severo) ta bira menos.

Bebe hopi awa

Mirando cu dehidracion ta un di e causanan principal di sintomanan di hangover, ta hopi recomendabel pa bebe awa entre bebidanan alcoholico pa asina mantene e curpa hidrata.

Bebe bebidanan cla (vodka) en bes di scur (whiskey)

Bebidanan scur ta mas halto den congeners (kimico cu ta resta despues di e proceso di fermentacion). P'esey un whiskey, biña cora of brandy tin mas chance di duna'bo un hangover severo compara cu bebidanan cla manera vodka, gin y rum blanco.

Tuma bo tempo

Tuma bo tempo ora di bebe alcohol. Por ehempel, bebe solamente un bebida cada ora, pa asina bo curpa tin tempo pa procesa e alcohol miho.  

Mas cu tur cos, conoce bo mes

Asina cu bo sinti straño, cuminsa bebe awa y si ta posibel come algo (saludabel).


Lesa tambe: Wayaba? Esaki por yuda