Si bo ta wayaba, no tin un medicina of un ‘triki’ cu lo ponebo sinti bon di biaha. Loke si tin ta cierto cos cu bo por haci — of evita di haci — cu por yuda’bo recupera mas lihe.
Prome bo bebe
Prome cos cu bo mester sa ta cu preparacion y loke bo ta haci durante cu bo ta bebe alcohol ta mas efectivo cu loke bo por haci despues cu bo a bebe (dimas) caba. Preveni di lanta wayaba door di no bebe, of bebe modera, ta e miho decision. Si bo sa cu bo ta bay bebe, percura pa bo no bebe cu un stoma bashi. Come suficiente y percura pa bo come cuminda cu basta proteina. Un stoma yen ta yuda reduci e concentracion di alcohol den bo sanger.
Durante e bebemento
Parti di loke bo ta sinti ora bo ta wayaba ta wordo causa door di un falta di suficiente likido den bo curpa. Alcohol tin un efecto cu ta ponebo perde likido (dehydration). Pa yuda combati esaki, ta recomenda pa bebe awa, preferiblemente un glas di awa despues di cada bebida alcoholico. Esaki por pone bo curpa absorba e alcohol menos lihe y tambe ta yuda tene e concentracion di alcohol den bo sanger mas abou. P’esey, ora di bebe alcohol awa ta bo miho amigo.
Poco poco
Bo curpa mester di tempo pa procesa alcohol. E tempo ta varia di persona pa persona, pero un average ta alrededor di 60 pa 75 minuut pa cada unidad alcoholico (1 cerbes, 1 glas di biña, etc.). Si bo bebe mucho lihe, e chens cu bo ta lanta wayaba ta bira mas grandi. Pues si bo bebe, tuma bo tempo prome bo pidi un rond mas.
Despues di bebe
Despues di bebe alcohol, awa keto bay ta bo miho amigo. Prome bo bay drumi, bebe awa. Drumi cu awa bandi bo. Ora bo lanta, bebe mas awa. Un otro opcion ta pa bebe sports drinks pa motibo di e electrolytes cu tin den hopi sports drinks. Pero no tur experto medico ta convenci cu esaki ta yuda. Si bo ta kere cu ta un bon idea pa bebe sports drinks, considera bebe awa di coco cual ta un bon fuente natural di electrolytes.
A pesar cu awa mester ta ‘bo miho amigo’ ora di bebe, tene na cuenta cu hasta bebe awa tin su limite.
Koffie?
Hopi hende ta bisa cu koffie ta yuda si bo ta wayaba, pero diferente experto ta recomenda pa no bebe koffie ora bo ta wayaba. Un excepcion ta si bo ta custuma di bebe koffie diariamente caba. Den e caso ey, posiblemente keda sin bebe koffie por duna’bo (mas) dolo di cabes. Pues e efectonan di koffie por varia hopi di persona pa persona. Si bo dicidi di bebe koffie, dal un glas di awa su tras paso segun varios estudio koffie tambe tin su efecto di dehydration.
Mas alcohol?
Tin hende ta bisa cu nan ta sinti nan mes menos wayaba si nan dal un bebida cu nan desayuno. Esaki ta un mal idea. Kisas bo lo sinti (un tiki) miho pa un rato pa motibo cu den un sentido bo ta saca bo curpa for di un estado di ‘wayaba’ bek pa un estado di bebemento (atrobe). Pero e sintomanan di wayaba lo bin bek. Kisas pio. Pues lag’e den e boter y duna bo curpa chens pa recupera.
Pildo
Paracetamol of ibuprofen por yuda cu e sintomanan ora bo ta wayaba. Tene na cuenta cu mucho di e pildonan aki por ta malo pa bo higra cu ya caba tin hopi trabou procesando e alcohol cu bo a bebe. Pues sea cauteloso y consulta cu bo dokter pa ta sigur si ta un bon idea pa tuma cierto pildo, y si ta asina, cuanto bo por tuma.
Ehercicio?
Si bo ta wayaba y bo bay jog of haci otro tipo di ehercicio, posiblemente bo lo sinti’bi miho, pero no necesariamente. Si bo sintibi’bo miho, probablemente ta pa motibo di e boost di endorfina cu hende ta haya ora nan haci ehercicio. Di otro banda, varios experto ta recomenda pa bo duna bo curpa descanso. Si bo ta sinti cu haci ehercicio ta yuda’bo ora bo ta wayaba, tene na cuenta cu bo curpa ta perde likido ora di haci ehercicio. Corda dal bo awa!
Scucha bo curpa
Cada curpa ta diferente. Loke ta yuda un persona no necesariamente ta yuda un otro. Si un desayuno completo cu webo, bacon, pan, hashbrowns etc. ta traha p’abo, dal bay. Pa otro hende honing of algo otro cu sucu aden ta yuda nan sinti miho. Of kisas un glas di lechi prome bo bay drumi ta yuda’bo. Pone atencion na bo mes pa purba haya sa kico ta traha p'abo.
Importante
Si bo bebe, no core auto. Esaki no ta solamente pa bo propio bienestar, pero tambe pa e bienestar di otro ser humano den trafico. Si bo wak un persona bay sinta tras di stuur mientras cu e ta bou influencia di alcohol, par’e. Si ta necesario, busca ayudo pa par’e.
Si lanta wayaba a bira un custumber p’abo, kisas bo tin un problema (serio) cu alcohol. Tene na cuenta cu alcohol ta toxico y por causa hopi problema cu bo salud. Abuso di alcohol tambe ta un gran causa di problemanan social. Si bo ta kere cu (kisas) bo tin un problema, consulta bo dokter of tuma contacto cu F.A.D.A. (Fundacion Anti Droga Aruba):
Telefon: 583-2999 / 583-9610
Via chat: fundacionantidroga.org
