Un persona cu sinta ocho ora pa dia tin 40% mas chens di muri tempran. Wak television ta haci ainda mas daño. Tres ora di television ta ekivalente na ocho ora di sinta. Es mas, haci mey ora di deporte tur dia no ta suficiente pa combati e daño cu sinta ta haci na nos curpa. Sinta ta mata
Mey ora di cana, core, traha den cura of den cushina no ta suficiente, mientras cu esaki keto bay ta conta como e norma pa movecion diario. E realidad ta pinta scur: pa compensa pa ocho ora di sinta, bo mester move por lo menos ún ora pa dia. Hasta si bo acumula e ocho ora di sinta door di sinta na varios momento di dia, por ehempel cuater ora mainta y cuater ora anochi, e consecuencia ta keda mesun cos. Esaki ta conclusion di un estudio di largo plazo bou casi 8.000 Americano di 45 of mas aña di edad cu recien a keda publica den Annals of Internal Medicine.
Na Aruba nos ta sinta hopi. Mas y mas trabou ta tuma luga den oficina. Despues di trabou nos ta bay cas sinta den auto of bus. Y ora nos yega cas nos ta sinta (y hopi ta come) tras di television. Mescos ta conta pa Hulanda, caminda un adulto ta sinta 9 ora pa dia y hobennan hasta mas cu 10 ora pa dia.
Un persona cu sinta ocho ora pa dia tin 40% mas chens di muri tempran. Wak television ta haci ainda mas daño. Tres ora di television ta ekivalente na ocho ora di sinta.
Con sinta dimas ta causa malesa
Hende cu sinta hopi tin mas riesgo di haya nan mes confronta cu entre otro diabetes, malesa di curason, depresion, dolor di lomba y cancer di pecho of prostaat. Tin mas o menos 35 malesa cronico cu desproporcionalmente ta afecta persona cu un estilo di bida di sinta hopi. Ora bo sinta hopi, e velocidad di bo metabolismo ta disminui. Ora esaki bira demasiado abou, menos sucu y vet ta wordo absorba den bo sanger y esaki por conduci na sobrepeso y diabetes.
Kiko bo por haci?
Mientras cu sinta dimas ta peligroso y por tin consecuencia fatal, haci compras, cushina of simplemente para riba bo pianan ya ta beneficioso pa bo metabolismo. Haci movecion intenso pa mey ora, manera core, ta keda necesario pero no ta suficiente; tene na cuenta cu bo mester keda den movecion henter dia. E recomendacion di e estudio ta concreto y simpel: cada mey ora, lanta y move pa algun minuut. Ni maske cuanto ehercicio bo haci, sinta pa periodonan largo ta hisa e riesgo cu bo lo muri mas lihe. P'esey keda den movecion ta e miho solucion.
