Actitud toxico den relacion

Na un of otro momento nos tur ta haya nos mes ta haci un of mas cos cu no ta contribui na e bienestar di nos relacion of hasta ta causa cu nos relacion ta bira toxico. Hopi tin di haber cu e manera cu nos ta comunica. Importante ta pa bira consciente y purba coregi mas hopi posibel. Esaki ta conta pa ambos persona den e relacion. 

 

Tin un diferencia entre reclama y critica bo pareha. Reclama ta enfoca ariba e comportacion di e pareha. E intencion di reclama, ta pa haci e pareha consciente cu cierto comportacion no ta wordo aprecia.  

Por ehempel: ‘Mi a haya fastioso cu bo a yega laat sin avisa’mi cu bo lo bay tarda.’ 

E hecho cu bo pareha no a comporta su mes manera abo a spera, no ta haci’e un mal persona. 

Critica bo pareha, den e mesun scenario, lo ta: ‘Nunca bo ta tene cuenta cu otro hende. Bo ta hopi egoista. Bo no a worry cu bo a laga’mi warda.’ 

Esaki obviamente ta un atake personal. Bo ta comunicando na un manera incorecto, pues bo no ta enfocando ariba e comportacion, bo intencion ta claramente pa ataca bo pareha como persona.  

 

Rebaha ta nifica falta respet na bo pareha. E por ta den hende – locual ta haci’e pio – of den priva. Ehempelnan ta uzo di sarcasmo, ridiculisa, yam’e pa cierto nombernan, of uza gestonan manera ‘eyerolling’, cu e intencion di lag’e sinti cu e ta bobo, kens of no tin balor.

Un ehempel di esaki: ‘ABO ta cansa? Bo ta na cas hender dia! No lubida ken ta trece pan ariba mesa den e cas aki. Corda si ami bay keha di ta cansa! Pfff!’

E actitud aki ta completamente fout y innecesario y ta bisa mas di bo mes como persona, cu di bo pareha. Actitud asina ta tipico pa personanan cu tendencia narcista.

 

Ta defensivo ta nifica, cu bo ta defende bo mes desproporcionalmente y hasta ora cu obviamente bo no tin razon. 

Esaki por ta un reaccion ariba e hecho cu bo pareha hopi bes ta critica y/of rebaha’bo pero tambe por ta un sistema di defensa cu bo a desaroya durante bo infancia of adolescencia – na unda constantemente bo a sinti’bo ataca – y cu a bira parti di bo caracter. 

 

Por ehempel, bo pareha ta puntra: ‘Bo a corda yama disculpa nos pa no por bay e fiesta awe nochi?’

Bo sa cu boso a palabra cu abo lo yama, pero bo a lubida di hac’'e.

E contesta defensivo lo ta: ‘Bo ta kere mi no tin nada di haci henter dia? Bo sa masha bon con druk mi ta! Dicon abo mes no por a yama?’

E contesta corecto lo ta: ‘Berdad nos a palabra esey, pero mi tawata hopi druk awe y mi a lubida. Mi ta bay yama nan awor.’

 

Semper lo tin momentonan cu bo lo hayabo den necesidad pa defende bo mes, pero ta bon pa distingui ora tin of no tin motibo.

 

 

Esaki ta nifica ignora bo pareha a proposito, door di haci como si fuera bo ta demasiado ocupa cu otro cosnan, cu e intencion di blokia comunicacion.

Esaki por pasa na momento cu bo ta demasiado fada of rabia pa por tin un combersacion racional cu bo pareha. E por ta un reaccion ariba e hecho cu bo pareha ta critica, reclama of ta defensivo constantemente y abo a cansa di esaki. Pero tambe por ta, cu abo ta un persona cu generalmente ta prefera di evita confrontacion y ta demostra bo malcontento door di no papia cu bo pareha.

 

Ora cu bo ta sinti asina, duna bo mes un pauze y bisa bo pareha. Por ehempel: ‘Mi ta mucho disgusta pa papia awor. Mas laat nos ta papia.’ 

Bisando esaki, bo ta laga e cos fria un rato, mientras toch bo ta mantene e canal di comunicacion habri.

 

Tuma mas o menos un ora di tempo pa bay haci algo cu bo gusta, y despues bin bek y continua na unda boso a keda. Papia trankilamente y abiertamente y keda na e topico y expresa cu detayes con bo ta sinti al respecto. 

Comunicacion en realidad ta algo hopi simpel. Ta nos como ser humano ta haci’e mustra dificil. 

 

Tuma tempo pa reflexiona ariba bo manera di comunica, y haci cambio na unda ta necesario, pa un miho relacion.