Cuarentena cu bo pareha

 

E situacion diario na unda ambos of un di dos tawata pasa un minimo di 8 ora pafo di cas, socialisando cu coleganan of pasando tempo cu famia y amistadnan ya practicamente no ta existi, pa un temporada indefini. Esaki ta pone cu hendenan ta bay focus ariba social media, pa por sali for di e monotonia di bida diario. Combersacionnan personal y group chats via WhatsApp ta na ordo di dia, y awor mas cu nunca. Facebook ta ‘red hot’, y hopi ta haci uzo di diferente forma di video calling pa por comunica cu nan famia, coleganan of amistadnan. 

Pero awor, con ta para cu e comunicacion den relacion di pareha? For di e pio situacion kisas por surgi e miho oportunidad pa drecha comunicacion y fortifica e lasonan di pareha. Hopi di nos ta menos druk, cu mas tempo pa dedica na combersacionnan di pareha. Corda cu un bon comunicacion semper mester ta un prioridad si bo kier tin un relacion solido y duradero. Hopi ta esnan cu ta pensa cu lo ta dificil pa convivi henter dia, 24/7 cu e pareha den cas. Por wak esaki na e tantisimo jokenan ariba Facebook. Pero net awor cu bo ta practicamente bo so, sin e libertad pa bishita famia, amigonan y coleganan, ta bon pa realisa riba ken eigenlijk bo por depende. Como pareha ta importante pa realisa cu boso ta un team. Y ta net den un situacion asina bo lo bay ripara esaki mas aun, ya cu un mester colabora cu otro pa hunto por sostene e hogar. Conhuntamente mester haci palabracionnan y haya maneranan creativo pa adapta na e sistema nobo. Pues, for di e situacion precario aki, por surgi tambe un ‘bonding’ nobo di pareha, un compromiso nobo cu ta fortifica e lasonan existente, cu kisas door di falta di atencion pa esaki, a bira zwak.

 

 

Compronde cu p’e tambe ta dificil e situacion actual di no tin acceso na bishita cu famia y no por bay trabou pa topa y socialisa cu coleganan y amistadnan y cu esaki por causa cu e ta sinti’e down na cierto momentonan.

 

Compronde cu e tambe por tin frustracion cu e situacion actual na unda e no tin libertad pa por practica su deporte of hobbynan faborito, door di e restriccionnan necesario pa preveni plamamento di e virus.

Como pareha ta importante pa duna otro e espacio pa desahoga sin husga of tum’e personal.”

 

Compronde cu den dje tambe por reina incertidumbre, preocupacion y kisas hasta momentonan di panico ora e puntra su mes, con e economia lo bay sobrebibi e klap aki, y si a lo largo lo tin suficiente placa pa paga debenan of – pio ainda – pa sigui tin un dak ariba cabes y cuminda ariba mesa.

 

Compronde pues, cu mescos cu’bo y tur otro hende, e por ta den un periodo dificil na unda su reaccionnan hopi bes no tin di haber cu’bo, pero cu frustracion y preocupacionnan propio. Como pareha ta importante pa duna otro e espacio pa desahoga sin husga of tum’e personal. Tambe ta importante pa duna cada un “me-time”, pues espacio pa por ta su so y ocupa su mes cu cosnan cu e ta gusta haci. 

Ta hopi importante pa no pone presion innecesario ariba otro na e momentonan aki, sino keda flexibel pa cambionan den boso sistema di haci cosnan. Si ela falta di haci algo den cas, cu relativamente no ta algo importante, let it go – pa e momento aki – y focus ariba tur e cosnan bon cu si e ta haci. 

 

Coopera pa mantene harmonia y haci e estadia den e hogar uno mas placentero posibel. Bin cu ideanan creativo pa ‘date’ bo pareha na cas: cushina hunto, organisa bo mesun wine & cheese party pa dos, hunga weganan di mesa, planea un ‘sexy date night’ na unda boso ta bay purba cosnan nobo (uza bo imaginacion of YouTube pa ideanan innovativo) y disfruta di e tantisimo pelicula y serienan cu bo kier a wak riba Netflix. Awor boso tin menos pura y mas tempo pa pasa hunto. Percura pa uza boso tempo hunto pa combersacionnan mas profundo, y pa comparti ideanan y planes, aunke esakinan por lo pronto no lo por wordo concretisa. Esaki ta duna inspiracion y speransa pa futuro.

 

Y por ultimo: Keda cu e conviccion cu hunto boso ta mas fuerte, y mantene e fe cu nos lo sali for di e situacion dificil aki, un dia of otro.