Conexion intimo di pareha (parti I): e hende homber

couple under tree
Cua ta e ultimo biaha cu bo a tene man, caricia, brasa of sunchi bo pareha? Cuanto bes boso a tene relacion sexual durante e luna cu a pasa? Si bo no ta pone atencion regularmente na esakinan, mi lo mag di asumi cu pa’bo nan no ta importante? Y….. con sigur bo ta, cu bo pareha ta pensa mescos cu’bo? 
 
Hopi cos ta bay fout door di falta di comunicacion, pero tambe door cu e forma di expresa amor y otro sentimientonan, generalmente ta diferente entre homber y muhe. Ta bon pa conoce y ta consciente di e diferencianan aki, pa bo por compronde bo pareha su necesidadnan. 
 
E motibo mas comun pakico parehanan ta infiel of relacionnan ta kibra ta simpel: expectativanan cu no ta wordo cumpli. Mi ta bisa esaki, no solamente a base di teorianan ariba mi tereno, pero principalmente a base di experiencia den mi ultimo 25 aña di bida, no solamente como coach di relacion, sino como abogado di divorcio y tambe e ‘go to’ person pa hopi amistad, cu a sinti comfortabel pa confia’mi nan problemanan di relacion.
E motibo mas comun pakico parehanan ta infiel of relacionnan ta kibra ta simpel: expectativanan cu no ta wordo cumpli.”

Expectativanan general ta diferencia entre hende homber y hende muhe y banda di esey ta bin expectativanan personal cu ta varia di persona pa persona. Den e caso aki mi kier pone atencion na expectativanan general. Mi ta scoge, sin ningun motibo particular, pa cuminsa na analisa e hende homber, pa den parti II sigui cu e hende muhe.
 

E hende homber

E hende homber generalmente tin mas inhibicion pa expresa emocion cu e hende muhe, principalmente door di e manera cu e ta wordo lanta. E principio ta, cu homber no mag di demostra emocion, mester ta fuerte, no mag di zeur, yora, etc. For di mucha e mester pretende di ta ‘tof’, pa miedo di wordo tenta, hari of yama pa ‘gay’. Di otro banda, ya caba como hoben adolescente, e ta wordo introduci na sex; den e caso aki no por lubida nos bunita ‘tradicion’ di hiba un menor di 16 aña San Nicolas pa ‘korta kam’. Pues no ta sorprendente, cu hopi homber ta demostra inclinacion pa competi, blof, exagera (principalmente den stamina y cantidad di muhe) y minimalisa nan emocionnan. 
 Pues no ta sorprendente, cu hopi homber ta demostra inclinacion pa competi, blof, exagera (principalmente den stamina y cantidad di muhe) y minimalisa nan emocionnan.”

Bayendo bek na e origen di esaki, e hecho cu e hende homber su manera di expresa su mes ta diferente cu esun di hende muhe no ta asina dificil pa compronde. Homber ta expresa su mes facilmente via sex. Esaki ta su idioma di comunicacion. Sex ta haci e homber sinti stima, special, aprecia, desea, etc. Den bista di un hende homber, sex ta un manera efectivo pa mantene y fortifica e lasonan di pareha. Den caso cu e logra satisface su pareha e ta lag’e sinti su mes sigur den e relacion y den caso cu esaki ta tuma luga regularmente, e ta zorg pa e keda sinti atraccion pa su pareha. Claro cu sex ta alimenta e homber su apetito fisico tambe, pero esey no ta tur cos. En realidad locual e homber ‘deep down’ ta buscando mediante sex ta: satisface su necesidad emocional: sinti stima, special, aprecia, desea, etc., aunke probablemente e lo haci su maximo esfuerso pa nenga esaki, pa e mesun motibo: e manera con ela wordo lanta. No ta pornada cu cierto infielnan, pa con superficial y machista cu nan por parce, ta ‘catch feelings’, door di e conexion emocional produci mediante sex, y ta termina enamorando di nan amante, principalmente despues di a mantene un relacion sexual frecuente y di largo duracion cu e persona ey. E riesgo ta mas grandi, den casonan unda e homber en cuestion practicamente no ta haya sex na cas. Den un caso asina por papia di desconexion den cas y conexion pafo di cas. 
No ta pornada cu cierto infielnan, pa con superficial y machista cu nan por parce, ta ‘catch feelings’, door di e conexion emocional produci mediante sex, y ta termina enamorando di nan amante...”

Caminda cu pa e hende muhe sex tal bes ta un opcion y no un di e cosnan di mas importante, pa un hende homber, generalmente y den mayoria caso, sex ta un di e ingredientenan mas importante y siguramente un di e mayor expectativanan den su relacion.
 
Damas, tene esaki den mente en espera di parti II di e topico aki, den cual mi lo bay elabora ariba e hende muhe. Cabayeronan, keda pendiente. 
 
Desiree Swaen2
Desiree Swaen ta un Coach profesional certifica, specialisa den bida, relacion, sexualidad, perdida y spiritualidad. Combinando su pasion, educacion, training y experiencianan personal, Desiree a funda DS Relationship Coaching / DS Love Coach cu un solo meta: yuda hende descubri amor den nan mes y den otro. Sigui Desiree via su pagina di Facebook