Den parti I nos a keda unda pa mayoria di hende homber generalmente sex ta sumamente importante, y no solamente pa e sensacion fisico. Nan tin e expectativa di sex como parti fundamental di nan relacion. Awor, si nos sali for di punto di bista di “trata e otro manera abo kier wordo trata”, e hende homber lo por conclui cu dunando e hende muhe solamente sex caba, e lo cumpli tambe cu e hende muhe su expectativanan. Pero esaki mayoria bes no ta e caso, y aki ta unda cos hopi bes ta bay robes.
Pa un hende muhe – atrobe: generalmente – locual ta sumamente importante no ta sex, sino: Afeccion, preferiblemente demostra di manera explicito.
Mayoria hende muhe tin inhibicion ora ta trata di sex, door di e manera con nan a wordo lanta.”
Dicon? Pa esaki nos mester bay bek den tempo. Mayoria hende muhe tin inhibicion ora ta trata di sex, door di e manera con nan a wordo lanta. E principio moralista, cu muhenan no mag di ta ‘criaturanan sexual’ por wordo mira entre otro den e hecho cu for di chikito un mucha muhe subtilmente ta wordo prepara pa ta un ‘mama’, mientras ainda nan no ni conoce bida, ta wordo encurasha pa hunga cu popchi cu wieg, tetero etc., y tambe den e hecho cu un mucha muhe for di chikito ta wordo reclama pa su manera di bisti: “Un mucha muhe decente no mag di bisti provocativo...” etc. E principionan aki a hinca den hopi hende muhe un sentimiento di culpabilidad y berguensa di tal magnitud, cu te na grandi, casa cu yiu, ainda nan ta sinti incomodo cu nan curpa y nan sexualidad y ta sinti cu nan no mag di expresa nan mes ni disfruta di placer, sin cu nan lo wordo yama pa e afamado palabra cu ta cuminsa cu P. Di otro banda y den comparacion cu hende hombernan, muhenan si tin ‘permiso’ pa expresa emocionnan - por ehempel yora - libremente y abiertamente.
Un hende muhe generalmente ta desea di sinti stima, special, aprecia, desea etc. y door di sinti esaki e ta wordo inspira pa ta mas intimo cu su pareha.”
Pa e motibo aki, e manera con muhenan ta expresa emocionnan, p.e. amor, aprecio, gratitud etc., generalmente ta diferencia di esun di hende homber. Un hende muhe generalmente ta desea di sinti stima, special, aprecia, desea etc. y door di sinti esaki e ta wordo inspira pa ta mas intimo cu su pareha. Esaki ta pakico gestonan diario di afecto, manera caricia, brasa, sunchi, y otro detayenan romantico manera bis’e cu bo ta stim’e, cu e ta bunita/sexy, ta importante pa mayoria hende muhe. Na unda pa un homber kizas esaki ta conta dimes, pa un muhe ta importante pa un homber vocifera esaki. Motibo principal pa infidelidad den hende muhe generalmente ta falta di (demostracion di) afeccion.
Como Love Coach di parehanan, e keho mas frecuente di homber ta falta di sex, of sex cu ta sinti manera e ta wordo duna ‘obliga’, sin smaak. Den contraste, e keho mas frecuente di muhe ta cu e homber no ta afectuoso, no ta romantico, no ta bis’e cu e stim’e, etc. pues, den conclusion, ambos no ta sinti nan mes stima, aprecia, balora etc.
Importante pa abo por sinti’bo satisfecho den bo relacion, ta pa duna di bo parti pa cumpli cu e necesidadnan di bo pareha. Esaki ta conta pa tanto e hende homber como e hende muhe.”
Importante pa abo por sinti’bo satisfecho den bo relacion, ta pa duna di bo parti pa cumpli cu e necesidadnan di bo pareha. Esaki ta conta pa tanto e hende homber como e hende muhe. Claro, cu un hende homber tambe lo aprecia un: “mi ta stima’bo”, “danki”, “mi ta aprecia esaki”, “bo ta nechi/sexy”, y un muhe tambe lo disfruta di un bon encuentro sexual, pero gestonan di afeccion solamente no lo satisface e necesidad principal di un hende homber, mescos cu sex so no lo satisface e necesidad principal di e hende muhe.
Food for thought:
Un homber cu no ta haya sex no ta ta sinti stima, aprecia, balora, desea etc. y no lo sinti motivacion pa demostra afeccion.
Un muhe cu no ta haya demostracion di afecto no ta sinti stima, aprecia, balora, desea etc. y no lo wordo inspira pa haci sex.
Una bes cu bo compronde esaki, e resto ta hopi simpel.
Tip pa e hende homber: Demostra bo pareha e afeccion cu e mester, y bo lo haya e sex satisfactorio cu abo mester.
Tip pa e hende muhe: Duna bo pareha e sex satisfactorio cu e mester, y bo lo ricibi e demostracion di afeccion cu abo mester.
Esaki lo percura pa un conexion constante entre boso dos como pareha.
Si berdaderamente bo ta stima y balora bo pareha, mi ta asumi cu bo lo kier wak e feliz y satisfecho, y cu abo lo kier hunga un rol principal den esey.”
Un relacion ta un ‘give and take’: comunica frecuentemente tocante bo expectativanan, y haci un esfuerzo sincero pa cumpli cu expectativanan di bo pareha. Y mi no ta bisando esaki den sentido manipulativo. Si berdaderamente bo ta stima y balora bo pareha, mi ta asumi cu bo lo kier wak e feliz y satisfecho, y cu abo lo kier hunga un rol principal den esey.
Pa mas tips con pa mehora comunicacion y conexion di pareha, sintoniza Love Talk, den cual ami hunto cu mi colega Julisa Arends-Hoevertsz ta trata temanan di bida y relacion y After Dark, den cual nos ta trata temanan cu tin di haber cu intimidad y sexualidad. Pa fechanan, luga, horario y topiconan, like mi Facebook page: DS Love Coach.
Desiree Swaen ta un Coach profesional certifica, specialisa den bida, relacion, sexualidad, perdida y spiritualidad. Combinando su pasion, educacion, training y experiencianan personal, Desiree a funda DS Relationship Coaching / DS Love Coach cu un solo meta: yuda hende descubri amor den nan mes y den otro. Sigui Desiree via su pagina di Facebook.
