Hopi ta esnan cu ta bin cu e pregunta, kico por haci pa luci miho posibel durante un prome cita, especialmente pa purba garantisa un segundo oportunidad.
Prome cu tur cos, tene na cuenta cu esaki ta un persona cu bo no conoce y cu no conoce’bo. Pues, esaki lo bay ta un cita pa sera conoci cu un persona nobo. Durante un prome cita, tin tres factor cu lo determina e probabilidad di un segundo cita: atraccion fisico, kimica y caracter.
Atraccion fisico
Den un mundo ideal, bo apariencia fisico no ta importante. Sin embargo, den e mundo real esaki si ta e caso. Dicon? Wel, e prome cos cu e persona nobo aki lo sera conoci cune ta bo fisico. Si esaki mustra interesante p’e, e lo ta mas entusiasma pa sa mas di’bo. Cada hende tin un gusto personal pa locual ta trata aspectonan fisico. Pero, mescos cu den caso di un entrevista di trabou, e prome impresion ta conta. Pues, si bo ta planeando un prome cita, zorg pa bo ta e miho version posibel di bo mes, cuminsando cu bo apariencia fisico.
... zorg pa bo ta e miho version posibel di bo mes, cuminsando cu bo apariencia fisico.”
Hende muhe, cuminsa pa zorg pa cabey bon cuida, cuero hidrata, huñanan limpi y netjes y evita demasiado make-up of demasiado perfume. Pa e hende homber, un bon corte di cabey, barba y huñanan bon cuida, colornan cu ta cuadra y un holo limpi ta cosnan hopi atractivo. Pa ambos ta conta, djentenan blanco, limpi y un bon aliento. Bisti algo adecuado pa e ocasion, dependiendo di e luga na unda e cita lo tuma luga. Claro cu tin mas detaye cu lo por menciona, pero esakinan ta algun ehempel di cosnan cu hendenan sa ripara di otro durante e prome cita.
Kimica
Pa locual ta trata Kimica, esaki ta depende di si bo ta ‘klik’ cu e persona of no. Cierto cosnan, manera un sentido di humor of opinion similar y e sintimiento di por ta ‘bo mes’ den presencia di e otro, ta mustra den e direccion di un bon kimica. Esaki no ta cos cu bo por prepara pe, pero si e ta algo cu pa hopi hende ta “make it or break it” durante un prome cita.
Caracter
E manera cu bo ta expresa bo mes, ta duna e otro un prome impresion tocante bo caracter. Kico pa bisa y no bisa? Esaki ta un pregunta cu tambe sa bin dilanti bastante biaha. Importante ta pa bo por sinti’bo liber pa expresa bo mes, pero tin algun punto cu mester tene cuenta cun’e y cu hopi bes ta resulta hopi iritante, no solamente pa e otro persona pero kisas tambe pa tercera personanan cu ta presente durante e prome cita.
Evita lo mas posibel e siguiente actitud:
- Haci joke dobel sinti of cu no ta pas
- Papia cu voz halto of uza palabra malo
- Papia di manera discriminatorio of arogante tocante otronan en general
- Demostra mal manera ora di trata cu waiters of esnan cu ta sirbibo durante e cita
- Bebe alcohol di manera excesivo
- Contesta mensahenan di celular regularmente durante e cita
... observa con e ta expresa su mes tocante su ex(nan).”
Sumamente importante
Evita papia di bo ex(nan). Esaki por haci solamente si e otro persona habri e combersacion tocante esaki. Si esaki ta e caso, evita bay den detayes, pero observa con e ta expresa su mes tocante su ex(nan). Si bo ripara cu constantemente e ta referi na nan di manera sumamente denigrante, pintando su mes cada bes como victima, probablemente ta trata aki di un persona cu no a ‘get over’ su ex(nan) ainda of cu no sa di para responsabel pa su actonan y cu den un eventual futuro cu’bo tampoco lo sa di admiti su propio erornan. Red flag.
No laga demasiado cosnan personal los durante e prome cita.”
No laga demasiado cosnan personal los durante e prome cita. Corda cu aki ta trata di un persona cu bo no conoce y cu no tin mester di sa bo bida completo den e prome cita.
Mantene un aire di misterio
Esaki lo alimenta e interes pa sa mas di’bo. Djis smile, scucha cu atencion y sea amabel. Si e interes tey, lo tin hopi mas oportunidad pa combersacionnan mas profundo.
Desiree Swaen ta un Coach profesional certifica, specialisa den bida, relacion, sexualidad, perdida y spiritualidad. Combinando su pasion, educacion, training y experiencianan personal, Desiree a funda DS Relationship Coaching / DS Love Coach cu un solo meta: yuda hende descubri amor den nan mes y den otro. Sigui Desiree via su pagina di Facebook.
