Mayornan mag di interveni den relacion di nan yiu?

stressed guyMayornan mag di interveni den relacion di nan yiu? Esaki ta algo cu frecuentemente ta hunga un rol den problemanan di relacion. Tin mayornan cu pa e solo hecho di ta mayor, ta kere cu nan tin e derecho di maneha e relacion di nan yiu manera nan ta haya ta bon, no obstante cu e yiu ya ta mayor di edad.

E tendencia ta mas grandi ora cu e yiu (y eventual pareha) ta biba bou di e dak di un di nan mayornan. Den e caso ey ta riparabel, con e yiu ta sinti su mes bou presion di tal forma, cu e ta bay duna preferencia na e opinion di su mayornan riba e opinion di su pareha, y ‘pa evita problema’, tin biaha hasta ta hala e pareha y su necesidadnan completamente un banda na fabor di su mayornan. No ta necesario pa enfatisa con toxico e situacion aki ta pa un relacion. 
… e yiu ta sinti su mes bou presion di tal forma, cu e ta bay duna preferencia na e opinion di su mayornan riba e opinion di su pareha …”
 
Generalmente ami como coach y tambe como mayor, ta di opinion, cu mayornan en principio no tin e derecho di dicidi ken nan yiu mester date, of cu ken e mester casa of convivi. Esaki naturalmente ta conta pa mayornan di yiunan mayor di edad y cu ta capaz di tuma decisionnan riba nan mes. Y no ta importa si e yiu ta biba ainda bou di nan dak of si nan ta contribui na e yiu su estado financiero. Claro cu por tin reglanan di cas, cu cual mester cumpli y kisas reglanan tocante e manera con e yiu ta haci uzo di e placa cu ta dun’e, pero esaki no ta inclui automaticamente e derecho di scoge e yiu su pareha. Cu e persona ey no ta cay na agrado, pa motibo di por ehempel, su estado financiero, religion (of falta di religion), rasa, sexo, nacionalidad, cultura, preferencia politico, apariencia fisico of caracter, no ta hustifica intervencion y mucho menos cu e intencion di caba cu e relacion. 
… na cierto momento mester laga los, y confia den e yiu su ‘common sense’ y su capacidad pa duna direccion na su propio bida.”
 
Mayornan mester corda, cu tempo cu nan a bira adulto, nan (tambe) tawata di opinion cu nan ta ‘grandi scapá’ pa por scoge nan pareha. Y hasta si e escogencia ey na final no a resulta exitoso, si mayornan a zorg pa tuma e tempo pa lanta nan yiu corectamente y siñ’e norma y balornan importante, na cierto momento mester laga los, y confia den e yiu su ‘common sense’ y su capacidad pa duna direccion na su propio bida. 
Duna conseho de vez en cuando ta un cos y purba dirigi e yiu su relacion ta otro cos.”
 
E no ta facil. Semper lo keda existi preocupacion y tin bes cu e mayor lo sinti e necesidad pa duna e yiu un conseho. Pero duna conseho de vez en cuando ta un cos y purba dirigi e yiu su relacion ta otro cos. Laga los ta necesario, tambe pa e yiu por haya confianza den su mes. Door di duna e yiu constantemente consehonan di relacion, e mayor ta laga e yiu sinti manera un mucha chikito cu no ta capaz di zorg pa su mes ni di maneha un relacion. Esaki por tin consecuencianan desfaborabel. E yiu por dicidi di ‘never mind’ y keda biba den soledad pa motibo di miedo y insiguridad, of scoge na bienestar di su relacion, pa aleha di su mayornan. 
holding fingers
Unico caso unda ta completamente hustifica pa mayornan interveni, ta caminda mayornan ta dispone di evidencia cu e persona cu kende nan yiu ta (desea di ta) den un relacion, ta forma un peliger pa e yiu. Den casonan asina mi ta hasta puntra mayornan si nan no ta haya cu mester tuma accion, papia cu e yiu y dun’e un bon splicacion, cu pruebanan obhetivo, pidiendo e pa reconsidera e persona aki. Esaki por ehempel ta e caso na unda e yiu tin of kier cuminsa un relacion cu un persona emocionalmente of fisicamente abusivo, adicto na droga of alcohol sin intencion di busca ayudo, cu ta gasta placa compulsivamente of cu ta constantemente envolvi den delincuencia.  
Corda cu mayornan usualmente no lo haci esaki cu mal intencion, pero den locual nan ta considera bo bienestar.”
 
Pa e yiunan di mayornan cu constantemente ta purba interveni den nan relacion: corda cu mayornan usualmente no lo haci esaki cu mal intencion, pero den locual nan ta considera bo bienestar. Esaki ta bin door di custumber, pero tambe door di miedo pa perde’bo, miedo pa bo haci fout, miedo pa bo sufri, etc. Pues ora un mayor kier duna’bo un conseho, scuche y mustra aprecio pa esaki, y considera seriamente locual e ta bisabo, y den caso di desacuerdo, duna bo propio opinion y para firme p’e, pero semper cu e debido respet.
Desiree Swaen02
Love Coach Desiree Swaen. Potret: Ayrton Tromp

Desiree Swaen ta un Coach profesional certifica, specialisa den relacion, perdida y spiritualidad. Combinando su pasion, educacion, training y experiencianan personal, Desiree a funda DS Relationship Coaching / DS Love Coach cu un solo meta: yuda hende descubri amor den nan mes y den otro. Sigui Desiree via su pagina di Facebook