Un pregunta masha hopi haci na mi persona como coach di relacion, ta kico ta e diferencia entre sex y intimidad. Nan tin di haber cu otro, of un ta parti di otro, of ta surgi for di otro? Pa aclarea esaki, mi lo duna un splicacion cortico tocante cada un y di locual nan tin di haber cu otro.
Sex
Si tur cos ta bon, tur hende sa kico sex ta encera. E ta significa union corporal y intercambio di energia, pues tene relacion sexual ta uni dos persona fisicamente y energeticamente. Tin diferente palabra conoci pa describi e acto aki, cu antes tawata sa wordo yama ‘relacion carnal’.
E ta significa union corporal y intercambio di energia, pues tene relacion sexual ta uni dos persona fisicamente y energeticamente.”
Intimidad
Intimidad ta algo cu ta forma parti di tur relacion solido. E ta trata e preguntanan con profundamente bo conoce otro, y con liber bo ta sinti’bo pa expresa bo mes den e otro su presencia. E ta un estado emocional cu mayoria biaha ta existi solamente entre dos persona cu a logra establece un conexion hopi fuerte. Den un relacion intimo normal, sex ta e expresion fisico di intimidad. Den e caso ey, sex ta un acto cu ta simbolisa amor y conexion cu tambe sa wordo yama “making love” of “haci amor”. Den un relacion solido, intimidad ta promove sex y sex ta promove intimidad.
... sex ta un manera di ta intimo cu otro, pero e no ta e unico manera.”
Pero intimidad no tin di haber solamente cu sex. Tin pareha cu ta intimo cu otro, sin cu nan ta haci sex. Pa razonnan medico por ehempel, tin personanan cu tin problema cu penetracion sexual. Den e caso ey - aunke sex den mayoria relacion ta algo fundamental - e no ta preveni cu e pareha aki por tin un conexion amoroso y intimo. Por ehempel, pasa tempo hunto combersando riba topiconan di interes mutuo, of disfruta di contacto fisico no-sexual. Pues sex ta un manera di ta intimo cu otro, pero e no ta e unico manera.
Ta existi diferente opinion tocante sex y intimidad. Cada hende tin su propio punto di bista tocante e topiconan aki, y cada un opinion ta un derecho cu nos tur tin di respeta.
For di e punto di bista tradicional, sex ta bay man den man cu intimidad, ya cu solamente e por forma parti di un compromiso pa termino largo, o sea un matrimonio, originalmente cu e meta di procrea. For di e punto di bista aki, sex pafo di matrimonio ta wordo mira como un pica of en todo caso algo cu no ta bon of no ta pas.
Ta intimo cu bo pareha ta nifica ta abierto y honesto cun’e...”
Sinembargo, den un sociedad mas y mas moderno, no ta necesario mas pa tin un conexion entre sex y intimidad. Sex generalmente ta wordo mira simplemente como un acto fisico. Den e contexto ey, sex por ta e acto di mas intimo den cualkier relacion, sea un matrimonio, entre esnan cu ta biba hunto, of otro tipo di relacion amoroso, locual ta haci’e den e caso ey sinonimo di ‘haci amor’.
Pero tambe e por ta un acto sin consentimento (rape), un acto cu ta wordo paga pe (prostitucion) of un acto puramente pa placer fisico (‘one night stand’).
No ta importa e tipo di relacion cu abo tin: ta intimo cu bo pareha ta nifica ta abierto y honesto cun’e, y cu un nivel optimal di intimidad, indudablemente ambos lo experiencia un miho satisfaccion sexual.
Desiree Swaen ta un Coach profesional certifica, specialisa den relacion, perdida y spiritualidad. Combinando su pasion, educacion, training y experiencianan personal, Desiree a funda DS Relationship Coaching / DS Love Coach cu un solo meta: yuda hende descubri amor den nan mes y den otro. Sigui Desiree via su pagina di Facebook.
