Abo sa kico ta Stockholm Syndrome?

depressed woman in black on chair looking downwards
‘Stockholm Syndrome’ ta un condicion psicologico, cu a haya su nomber door di un sucedido cu a tuma luga dia 23 di augustus 1974 na Stockholm, Suecia. Riba e dia aki dos homber cargando arma semi-automatico a drenta un banco y a tuma tres muhe y un homber como rehen pa varios dia. Pa sorpresa, na final di e sucedido aki, e victimanan a tuma parti pa nan secuestradonan. Nan a defende nan dilanti prensa y polis. Un di e muhenan hasta a compromete su mes cu un di e secuestradornan. Un otro di e muhenan a gasta un cantidad di placa pa cubri gastonan di e defensa legal di e otro criminal. 
... su autoestima ta bira completamente dependiente di e aprobacion di e abusado.”
 
Desde e sucedido ey “Stockholm Syndrome” ta wordo uza como nomber di un condicion psicologico pa esnan cu ta ‘mara’ nan mes di manera adictivo na nan abusado. E victimanan ta hasta yega asina leu pa acepta e engañonan obvio di e abusado y racionalisa su mal comportacion. E condicion aki, cu tambe sa wordo yama ‘trauma bonding’ ta haci sumamente dificil – den cierto casonan imposibel – pa e victima los for di e abusado door di denunci’e, expone su mal conducta of bay lag’e. Fuera di esaki e abusado mayoria biaha ta uza tacticanan pa confundi e victima. Un rato e ta abusa, gaña, ta infiel, ta menasa y insulta e victima, y otro rato e ta mustra arepentimento, proclama amor, duna regalo y duna compliment.  
stockholm syndrom quote dimiri
Pa cualkier otro persona, un compliment of regalo nunca lo por sirbi como compensacion pa comportacion abusivo. Pero na un persona cu pa tempo largo a wordo exponi na manipulacion mental di un abusado di tipo psicopata of narcista, esakinan lo por duna speransa di cambio. E ta keda kere cu ‘deep down’ e abusado ta stim’e, aunke e abuso ta keda ripiti sin importa cuanto biaha e pordona. Un victima di Stockholm Syndrome iracionalmente ta kere cu si e haci suficiente esfuerso y demostra e abusado amor incondicional, un dia esaki lo mira luz. Di su banda e abusado ta encurasha e speransa falso mientras cu e kier pa e victima keda bou di su dominio. E victima practicamente ta dedica su bida na tene e abusado contento y consecuentemente su autoestima ta bira completamente dependiente di e aprobacion di e abusado. 
... mas un abusado haya for di su victima, mas e lo bay exigi.”
 
Pero abusadonan, psicopatanan y narcistanan nunca ta satisfecho. Pues, mas un abusado haya for di su victima, mas e lo bay exigi. Despues di añanan purbando di cumpli en vano cu su deseonan, e victima ta asina descurasha cu ta dificil pa e tuma e decision pa laga e abusado. Su auto estima por a wordo afecta di tal forma, cu e por pensa cu e no lo ta suficientemente bon pa ningun (otro) persona. 
Su auto estima por a wordo afecta di tal forma, cu e por pensa cu e no lo ta suficientemente bon pa ningun (otro) persona.” 
 
Esnan cu ta sufri di Stockholm Syndrome ta haya nan mes den un tunnel scur, unda nan no sa den ki direccion pa bay. Kico abo por haci como familiar of amigo/amiga? 
  • Scucha e persona y purba compronde cu den su condicion ta hopi probabel cu na prome instante e lo bay defende e abusado. 
  • Encurash’e pa traha riba su mes y haci cosnan exclusivamente pa complace su mes en bes di ta constantemente bezig ta purba ‘please’ e abusado. Corda cu e tendencia pa complace y haya aprobacion for di e abusado ta keda un factor di motivacion den tur locual e victima ta haci. 
  • Demostr’e bo apoyo incondicional y haci un esfuerso sincero pa compronde su situacion. Di e manera aki kisas e por cuminsa mira e diferencia entre un preoupacion autentico y e comportacion manipulativo y conviniente di e abusado.
 
Lastimamente, no ta importa cuanto amor y apoyo bo ofrece un victima di Stockholm Syndrome, e lo no bay yuda su mes mientras su wowo no habri pa e realidad den cual e ta bibando. Manera e caso di un adicto, ta solamente e mes por yuda su mes y esaki lo pasa solamente na momento cu e acepta cu e tin un problema y dicidi pa ‘take action’ y busca ayudo. 
 
Desiree Swaen
Love Coach Desiree Swaen. Potret: Ayrton Tromp

Desiree Swaen ta un Coach profesional certifica, specialisa den relacion, perdida y spiritualidad. Combinando su pasion, educacion, training y experiencianan personal, Desiree a funda DS Relationship Coaching / DS Love Coach cu un solo meta: yuda hende descubri amor den nan mes y den otro. Sigui Desiree via su pagina di Facebook