Tur hende sa of por imagina, cu e perdida di un ser keri ta un experiencia sumamente tragico. E ta trece cune un periodo di tristesa profundo (grief), kisas acompaña pa otro sentimientonan manera ansiedad y e deseo pa rebiba momentonan cu a wordo comparti cu e persona cu ya no tey mas. Hopi ta bisa cu e unico cos cu ta parce di yuda temporalmente, ta yora. Familiarnan di esnan cu ta pasando den un temporada dificil asina, hopi bes ta bira preocupa y hasta desespera, pensando cu e persona lo por cay den depresion y kisas cuminsa pensa pa suicida su mes. Ta importante pa sa si tin motibo pa ta alarma of no.
Si abo (of un ser keri) ta sufri di tristesa profundo (p.e. a causa di rouw verwerking) e sintomanan cu bo por tin, ta entre otro lo siguiente:
- Tristesa, desesperacion, rouw
- Cansancio of falta di energia
- Lagrimanan
- Perde apetit
- Dificultad pa drumi
- Dificultad pa concentra
- Deseo di rebiba momentonan alegre y tristo
- Sintibo culpabel (principalmente si abo ta sinti cu bo por a evita e perdida/morto di e persona)
Den caso di depresion algun sintomanan por ta mescos, acompaña pa un of mas sintomanan mas grave, manera entre otro:
- Sinti cu bo no ta bal nada
- Sinti’bo culpabel den forma excesivo
- Pensa riba suicidio
- Auto-estima sumamente abou
- Sinti cu bo no tin forza pa sigui
- Sinti cu bo no por yuda bo mes
- Sinti’bo agita
- Perde interes den actividadnan placentero
- Cansancio excesivo
Mas informacion tocante depresion: Kico ta depresion?
Ta importante pa esnan cu ta demostra sintomanan di tristesa profundo pa un periodo di mas o menos 6 siman, of ta demostra un of mas di e sintomanan mas grave, menciona ultimo, ta consciente cu esaki por ta un caso di depresion cu ta rekeri ayudo profesional. Rouw tin su motibo, tin un perdida pa deal cun’e, y e intensidad y duracion ta diferente pa cada persona. Pero sa presenta casonan di hendenan cu ta sinti nan mes hopi ‘down’ pero no por menciona un motibo concreto. Nan ta gewoon bisa nan ta sinti ‘laf’, ‘sin smaak’ etc. Si un ser keri ta bisa esaki y ta cuminsa isola su mes for di famia y amigonan, esaki ta un red flag pa investiga mas leu.
… sa presenta casonan di hendenan cu ta sinti nan mes hopi ‘down’ pero no por menciona un motibo concreto.”
Pero corda cu diagnostico di malesa mental ta algo hopi serio y complica, cu por tin consecuencianan fatal. Den caso di duda, bishita bo dokter di cas. Evita di hunga pa dokter of di medica bo mes. Como grief & bereavement counselor & coach, ami mes no ta trata hende cu depresion. Esaki ta wordo haci door di un psicologo cu lo aplica un forma di terapia adecuado pa yuda’bo cu esaki. Mi trabou ta encera trata esnan cu tristesa profundo a base di un causa concreto, manera perdida di un ser keri door di morto of terminacion di un relacion.
Love Coach Desiree Swaen. Potret: Ayrton Tromp
Desiree Swaen ta un Coach profesional certifica, specialisa den relacion, perdida y spiritualidad. Combinando su pasion, educacion, training y experiencianan personal, Desiree a funda DS Relationship Coaching / DS Love Coach cu un solo meta: yuda hende descubri amor den nan mes y den otro. Sigui Desiree via su pagina di Facebook.
