Tin diferencianan remarcabel entre coaching y terapia psicologico. Coaching ta traha di awo pa futuro y ta dirigi ariba prevencion di (escalacion di) problema of haya solucion rapido y efectivo pa un problema existente. Coaching ta focus ariba solucion, pues e approach ta hopi racional. E preguntanan di mas clave ta: “Unda bo ta awo?” “Kico bo kier logra?” y “Unda bo kier ta dentro di cierto periodo?” Por lo tanto coaching, cu ta enfoca ariba meta, accion y logro, lo pusha’bo y den mayoria caso lo traha hopi mas rapido cu terapia psicologico. Esnan cu ta coach profesional certifica a sigui un curso pa por trata personanan exclusivamente cu e metodo di coaching, pues un coach profesional hamas mag di profila su mes como un ‘therapist’ of ‘counselor’.
Terapia psicologico generalmente ta un forma di ayudo hopi mas avansa y profundo y por soluciona problemanan hopi mas complica cu coaching.”
Terapia psicologico ta focus ariba e problema, pa haya sa kico ta su origen, pues a consecuencia di kico e problema aki a surgi, y formula un plan pa trata y soluciona esaki. Terapia psicologico generalmente ta un forma di ayudo hopi mas avansa y profundo y por soluciona problemanan hopi mas complica cu coaching. Pa e motibo aki terapia psicologico tin un enfoke mas emocional y generalmente tin un trayecto hopi mas largo pa sigui. Terapia psicologico ta wordo duna door di un psicologo cu a sigui un estudio y ta dispone di un titulo oficial pa por practica esaki. Locual ta conoci como ‘counseling’, na Aruba generalmente ta wordo duna door di psicologo, mientras cu cierto psicologonan tambe sa haci uzo di e metodo di coaching como metodo di ayudo.
Coaching no mag di wordo mira como un metodo pa reemplasa terapia psicologico.”
Tur dos metodo tin su bentaha- y desbentahanan, dependiendo di expectativanan personal. Pero ta sumamente importante pa menciona, cu e metodo di coaching no mag di wordo mira como un ‘easy way out’. Coaching no mag di wordo mira como un metodo pa reemplasa terapia psicologico. Tin hende cu tin miedo of berguensa ora ta trata di bishita un psicologo, como cu ainda sa hiba e pensamento (eroneo) cu solamente esnan cu ta ‘loco’ lo mester bishita un psicologo y como cu e coach no ta un psicologo, ta acudi na e coach como alternativa. Esaki ta un decision contra-productivo. Tin hende cu mester di terapia psicologico. Mientras esaki no tuma luga, e persona aki no lo beneficia di coaching, mirando cu problemanan psicologico cu no wordo trata di rais, semper lo keda hunga un rol den su bida. Esaki por ehempel ta e caso ora e persona ta sufri a consecuencia di un of otro evento traumatico.
Pues, ta sumamente importante pa elimina cualkier ‘issue’ psicologico prome cu por saca probecho di coaching.
Pa otro topiconan cu ta relata na ‘life coaching’, ‘relationship coaching’, ‘bereavement (rouw) coaching’ of ‘spiritual coaching’, mi persona ta certifica den e areanan aki …”
E prome encuentro entre ami y posibel cliente(nan) ta wordo yama “Matching Session”. Den e session aki mi ta ‘screen’ cada posibel cliente pa wak si coaching den su caso ta e metodo adecuado y si ami ta e coach adecuado. Si un posibel cliente ta presenta cu un of otro trauma, ocasiona por ehempel door di abuso fisico of sexual, of cu un of otro problema di adiccion, esaki no ta mi competencia, pues ta mi deber di conseh’e pa bishita un psicologo. Si un persona ta bin cu un problema no-psicologico, pero relata completamente na metanan cu e kier logra den su carera profesional, lo mi consehe pa bishita un ‘career coach’. Pa otro topiconan cu ta relata na ‘life coaching’, ‘relationship coaching’, ‘bereavement (rouw) coaching’ of ‘spiritual coaching’, mi persona ta certifica den e areanan aki y en principio lo por duna e guia necesario.
Importante den tur caso ta, pa e cliente demostra seriedad y duna e señal cu e ta cla pa coaching … Sin e flexibilidad pa cambio, e resultado lo ta minimal.”
Pero semper ta keda, e gevoel – e ‘vibe’ – cu ami y e cliente tin pa cu otro. Importante ta pa e cliente sinti ‘na cas’ serca mi, ami sinti confortabel cu e cliente y cu nos por tin confianza mutuo. Si esaki no ta e caso, ami no lo ta e coach adecua pa e persona aki y mi lo conseh’e pa purba su suerte cerca un otro coach. Importante den tur caso ta, pa e cliente demostra seriedad y duna e señal cu e ta cla pa coaching, cu e tin suficiente determinacion y motivacion pa logra su metanan. E habilidad pa wak su mes den spiel y analisa su comportacion obhetivamente, ta un cualidad importante di un bon candidato pa coaching. Sin e flexibilidad pa cambio, e resultado lo ta minimal.
Love Coach Desiree Swaen. Potret: Ayrton Tromp
Desiree Swaen ta un Coach profesional certifica, specialisa den relacion, perdida y spiritualidad. Combinando su pasion, educacion, training y experiencianan personal, Desiree a funda DS Relationship Coaching / DS Love Coach cu un solo meta: yuda hende descubri amor den nan mes y den otro. Sigui Desiree via su pagina di Facebook.
